الى أمهاتنا الكرام
بعد تحيه الاجلال لمقامك العريق وبعد قبله الرأس واليدين والاقدام
أكتب لكي كلمات خجلت انا اقولها وأنا اواجهك
أعذريني أمي فهذه الفرصه الوحيده الي اقدر أعلمج فيها
فنحن طوال حياتنا نتعلم منك بكل ما فيها الحياة من تسامح وحب وعمل الخير والصلاه والزكاة وعباده الله
بس تأكدو يا أمهاتنا ان اليوم يخدعونكم
مو عشانكم مغفلين لا حشا انتو محشومين
ولا عشانكم مو متعلمين لا حشا انتو طلعتونا مثقفين
كل الي صاير يا يمه ان القنوات قاعدين يحطون اشياء مو صجيه
وانتي مو فاضيه تروحين تنبشين وتدورين الصج من الجذب
بس يما تأكدي ان احنا الي نطلع لكم الصج
يما قناة سكوب قناة تدور مصلحتها بس والله يا يما ما همها الكويت
يما محمد الجويهل كان مسجون وعليه قضايا خيانه شرف وامانه تدرين شنو يعني خيانه شرف وامانه يا يمه
انسان ما يحافظ عالشرف والامانه وانتو تربونا عالشرف والامانه شلون بتسلمين رقبتج ورقبت عيالج واحفادج حق شخص ما يحافظ عالشرف والامانه
يمه من طلع جويهل عمرج سمعتيه يقول انا بسوي شي حق عيالكم او لكم
كل كلامه قليل أدب ويتكلم عن المزدوجين بالجنسيه وان هذيل بياكلون حقوقكم
يا يمه هذا كلام فاضي
لو انه صاج في مره سمعتي ان جويهل قدم جناسي حق مزدوجين وتم سحب الجناسي من هالاشخاص
ماكو ولا راح تسمعين لان هذا الشخص يلعب بمشاعركم بس ويحسسكم ان الكويت مخطوفه
وبالاخير اهو مستفيد
يا يمه انا سلمتج مصيري ومصير احفادج
وسلمتج ارقبتي وارقبت عيالي وارقبت احفادج
ترى ضياعنا بيكون اذا عطيتي جويهل ونبيل الفضل
يا يمه لا تظلمونا سمعونا سمعو الشباب الي يستاهل ان يمثلكم
سمعو الشباب الي تسلمونهم رقابانا تكونون متطمنين
يمه سمعي عبدالله الاحمد
وسمعي فيصل اليحيى
وسمعي الحميدي السبيعي
وسمعي اسامه الشاهين
وسمعي محمد الدلال
وسمعي عبيد الوسمي
سمعيهم يا يمه شباب قلوبهم تصرخ عشانج وعشان عيالج واحفادج وعشان الكويت
يا امهاتنا انتو كفيتو ووفيتو وادري ان الحمل أكبر من الي احنا نقوله بس صدقيني يا يمه
وأول مره اطلب منكم تكفون صوتو حق الي يقولونه لكم عيالكم لانهم يبحثون ويعرفون خفايا انتو مو فاضين انكم تعرفونها وتدورون عليها
أمنتكم الله والله يحفظكم لنا
انا ولدكم صقر عبدالرحمن الحشاش